Weihnachtsgedicht 06

 2007

Weihnachtsgedicht 08

Vereinslokal: Gasthaus "Servus Grüß Dich", 1110 Wien, Geiselbergstraße 38-42
Vereinsabende: jeden 2. und 4. Montag um 19 Uhr

MUNDART WEIHNACHTSGEDICHT 2007

Sche laungsaum her'd se ollas auf

Sche laungsaum herd se ollas auf, a wama imma darauf schaut das des und des erhoitn bleibt, es herd se ois auf mit der Zeit.

A Mutta de fua vülen Joan mit Schmerzn Kinda hot geborn, de gschpiert des zwoa noch launge Zeit, doch kummt da Tag, daun is so weit. De Bindung Ötan Mutta Kind von Joa zu Joa etwos verschwind. De Kinda jetzt erwochsn san, woin söba ois entscheiden, da hüft ka zuaredn, ka nix, de woin im Ötanhaus net bleibm. Natialich is die Sorge groß, de Aungst se wern vasogn, doch no imma san de Ötan do, de kennans jo no frogn. Auch dieses herd se amoi auf, so is nunmal im Leben, swiad kane Ötan, kane Freind und uns an nimma geben.

So mauncha hot a Steckenpferd, a Hobby wia ma sogt, de gaunze Freizeit geht fost drauf und a vüh Müh und Plog.

De anan san de Makenschlecka, sitzn Tog und Nocht beim Tisch, de aundan san de Aquariana, de redn mit de Fisch. Und weis von denan vüle giebt, so haums a an Varein, und do wüh kana hintn steh, do wüh jeda da erste sei. Doch jetzta herdse des boid auf, weus leida kann mehr gibt, der seine Freizeit opfan wü und ollas übanimmt. Do hüft nix, wauns do no a san, de woin des ois erhoidn, schauts eich do omoi richtig um, mir kern scho zu de Oidn.

Weihnochtn, es eud herbei mit riesengroßen Schritten, da Santa CIaus is gaunz vurau und Rudoif zaht den Schlittn.

So kennan des jetzt unsre Kid's, weusas im Fernsehn sehgn, a Weihnachtsmau, a Cristkindl, de san scho längst pasee. Ka Mensch schreibt mer auns Cristkind, s'gibt nur mer SMS, ob net a I-Mel bessa wa, des steht jetzt no net fest. A Eipod und de X -Box drei de, stengan auf da Listn, a Pudlhaum, an Matador, de wirst do drauf vamissn.

Vorbei mit Tannenbaum und Kerzn, mit Christbamstickln drauf, der wird bestöd jetzt bei da Quelle und waunst erm brauchst, spaunst erm nur auf.

Da Kristbam is aus PVC, a des wos drobm hengt, ajeda findet des jetzt sche, weus kana aundas kennt. Und so vaschwindet Joa um Joa a Tei der Tradition, sehr vüle junge Leit von heit haum gornix ghert davon. Wos übableibt is Nostalgie aus längs vagaungna Zeit, denn ollas herd se amoi auf, jetzt is es scho so weit.

Frohe Weihnachten ...